12 જુલાઈ, 2026
સોશિયલ મીડિયાના સમયમાં વિદ્યાર્થીઓમાં વાંચન પ્રત્યે અભિરુચિ કેળવાય એવા ઉમદા હેતુથી જૂનાગઢમાં કાર્યરત વાંચન વલોણું દ્વારા તારીખ 12 જુલાઈ ને રવિવારે મહેર કન્યા છાત્રાલયમાં વાંચન વિષયક એક કાર્યક્રમ યોજાઈ ગયો. સંસ્થાના નિયામક હરદાસભાઈએ વાંચન વલોણું ના સભ્યશ્રીઓનું શબ્દોથી સ્વાગત કર્યું. ભાવેશભાઈ જાદવે વાંચન અભિયાનની ભૂમિકા રજૂ કરી હતી. એલ.વી.જોશીએ વિદ્યાર્થિની બહેનોને પ્રેરણા આપી કે ઉત્તમ પ્રકારના પુસ્તકો વાંચવાથી જ ઉત્તમ વિચારો આવતા હોય છે. ઉપરાંત દરરોજ કોઈપણ સારા પુસ્તકના 10 પાના વાંચન કરવાનો સંકલ્પ લેવો જોઈએ. ડૉ. હર્ષાબેન પાડલિયાએ કેવા પુસ્તકો વાંચવા જોઈએ એ અંગે માર્ગદર્શન આપ્યું હતું.આ કાર્યક્રમમાં રાજુભાઈ ઓડેદરા ઉપસ્થિત રહ્યા હતા. અંતે વાંચન વલોણું ગ્રંથાલયના પુસ્તકોમાંથી મનગમતું પુસ્તક મેળવીને વિદ્યાર્થિની બહેનોએ પ્રસન્નતા વ્યક્ત કરી હતી.
12 સપ્ટેમ્બર, 2026
૧૨.૦૯.૨૦૨૬ના રોજ જૂનાગઢની બહાઉદ્દીન સાયન્સ કોલેજ ખાતે ‘મુક્તાધારા ફાઉન્ડેશન – વાંચન વલોણું’ દ્વારા આયોજિત ‘બુક ટોક’ (પુસ્તક પરિચય કાર્યક્રમ)ની કેટલીક ઝલક. છેલ્લા બે વર્ષથી વધુ સમયથી વાંચન વલોણું દ્વારા જૂનાગઢના લોકોને વાંચન તરફ પ્રેરિત કરવાનો પ્રયાસ કરાઈ રહ્યો છે. વાચકોની સંખ્યામાં વધારો કરવાના ઉદ્દેશ્ય સાથે હાથ ધરવામાં આવતી પ્રવૃત્તિઓમાંની એક એટલે આ ‘બુક ટોક’.
આ કાર્યક્રમમાં બહાઉદ્દીન સાયન્સ કોલેજના વનસ્પતિશાસ્ત્ર અને ફોરેન્સિક વિભાગના વડા પ્રો. ડૉ. મનીષ જાનીએ શ્રી સુરેશ સોની દ્વારા લિખિત પુસ્તક “ભારતમાં વિજ્ઞાનની ઉજ્જવળ પરંપરા” વિશે વક્તવ્ય આપ્યું હતું.
